【期匯決算】油價僅短暫反彈？

【Now財經台】美國總統特朗普(Donald Trump)嘅對外貿易政策突然轉向商品市場，話會對伊朗石油進行二級制裁，即係除咗制裁伊朗出口嘅石油，更制裁幫襯伊朗嘅石油買家，但油價竟然造好，點解會出現呢個情咁？

獨立商品外匯分析師熊俊傑指，主要有兩個原因，雖然特朗普威脅有第二輪制裁行動，但最後會唔會做，又或者做咗之後對於原油供應嘅影響有幾大，都係未知之數。此外，由於中方釋出善意，指願意跟美方就關稅問題進行磋商，令市場對貿易戰風險嘅憂慮降溫。

但值得留意係，油價其實彈得唔高，仍處於下行趨勢，佢提醒，油價升勢仍偏向短暫為主，紐約期油及倫敦布蘭特期油要升至每桶62.3美元及65.5美元以上，先可以睇好油價，否則，下行風險仍然較大。