【FINTERVIEW】散戶趁中央再出救市「組合拳」獲利？

【Now財經台】中央再出「組合拳」救市，內地3大金融巨頭今早(7日)出招，其中，人民銀行宣布降準0.5個百分點，並下調多項政策利率，加上中美關稅談判傳出有新進展，市場氣氛明顯改善，刺激恒生指數今朝大幅高開逾500點。東亞證券原本估計恒指今年睇26000點，依家係咪可以再睇高啲？投資者短線可以點部署？

東亞證券高級投資策略師陳偉聰指，今次呢啲措施其實唔係新鮮事，但力度明顯較大，為市場帶嚟驚喜，加上財政部表明有信心實現今年經濟增長5%嘅目標，一定對市場短線氣氛有支持作用。

不過，Jason提醒，真正焦點仍然喺中美貿易談判進展，如果短期內仍然達唔到共識，關稅唔會大幅下調，投資者可能會再次擔心第2季經濟表現。

佢又認為，關稅消息導致恒指4月中急挫，依家成功收復失地，其實部分樂觀預期已經消化咗，所以暫時維持今年睇26000嘅目標，但前提係中美談判問題唔會惡化。短線部署方面，恒指已自低位回升逾4000點，Jason認為，現階段應該偏向審慎，適時獲利回套。