【名家給力場】梁杰文:晋安私有唔建議揀股份因為...

【Now財經台】上月底開始停牌嘅晉安實業(02292)獲大股東提私有化建議，每股0.78元，較停牌前收市價有約30%溢價，股份今日(12日)復牌一度勁升逾1倍，高見1.3元，高私有化出價66%，係咪有炒過龍之嫌？大股東提供現金、股份、現金加股份嘅方案，小股東應該點揀？

《香港股票財技密碼》作者梁杰文認為，晉安股價今日炒到咁高的確有少少奇怪，因為今次私有化嘅流程都比較簡單，亦講明唔會加價，雖然過往出現呢種情況，投資者認為公司物有所值，或憧憬私有化失敗後，公司會有提振股價方案，所以唔介意依家追入，但其實呢啲情況好少出現，主要都係投資者過度興奮，可能係今日嘅市況吸引資金短暫流入，Mike估計，晉安股價2至3日後有機會失守私有化出價。

Mike又指，控股公司嘅股份較難變現，所以唔建議選擇公司股份，如果私人公司冇上市，流動性會較低，再加上係離岸公司，小股東會難獲取公司嘅資訊，如果想變現，可能要憧憬公司之後再上市或派息，但不確定性都比較高。