【輪證贏家】Popmart Call博染藍

【now.com財經】噚日指數再見低走，睇返恒指日線圖陰陽陰陽咁玩咗四日，到今日指數出一個比較大少少嘅裂口向下落，日線圖有見靠近10線嘅，不過未到；但比較關注嘅係小時圖，皆因今日裂口低開之後，喺小時圖上見指數跳咗落去保歷加下降通道，中軸呢條線支持咗佢成個星期，終於都要失守。

開埋個街貨圖出嚟，見今朝指數第一口價已經將恒指熊證第一層全數收回，少少地26張期指街貨先吞；不過我諗大家嘅目標都係22,900至22,999點嗰層重貨牛，因炙為有相當於1,372張期指街貨。

但係咁，要指數向下殺到落重貨牛呢個位，即係迫佢連日線圖10線都要失守，雖然暫時條上升通道係無咗，之但係條10線都守咗咁耐...我保守少少。

今朝老同Fila提醒我，今日收市後恒指公司公布季檢結果，泡泡瑪特(09992)歡呼聲最高，其次為百濟神州(06160)。

玩染藍其實係有一個「傳統路線圖」，先留意恒指服務公布嗰日唔等於隻股同日即時染藍，係要隔一段時間先至正式染藍(通告寫明，唔駛估)。

喺呢段時間裡面，由於一啲指數基金要追返/搓返均啲藍籌持貨嘅比例，比較多見嘅係喺公布之後緊接嘅下一個星期一(以今次計即5月19日)，受到基金買貨刺激而令到股價都會上一上。

咁又唔會買好耐嘅，一日半日啦，買夠啦，就會冷靜返，即係等於中間等正式染藍嗰日之前嘅呢段時間。

去到臨染藍之前嘅一日，有可能會再有多一浸，因為呢一日係被視為追染藍前嘅最後機會。留意呢個玩法唔係100% work，重申一次佢只係「傳統路線圖」。

至於隻泡泡瑪特，噚日推到上200蚊創新高，今日隨大市下行返落去。而佢傳被染藍都唔係第一次，上季年初都一度成為大熱，只係最後倒灶啫。

如果按呢個路線圖咁玩，前題就係要佢真係成功染藍先啦，正股有得守可以考慮，貪槓桿嘅就出隻Call(15272)，收回價199.92元，2.55倍槓桿好似好雞，但最多睇均都係3.33倍，仲要喺一堆貼價call裡面摺到一隻低街貨嘅出嚟，算不錯架啦！

咁樣玩嘅話反正係要過夜，因為恒指服務公布係會收市之後先至公布結果，所以慢慢搵位都唔遲。

作者阿珊，以技術分析專心玩輪證，唔貪心，努力賺取我家肥貓罐罐。

直接去Patreon七日免費試用即市作戰教室：https://www.patreon.com/join/cbbcwar