【Now財經台】遊戲股IGG(00799)績後捱沽，今日(27日)低開逾3%後，跌幅擴大，好快已失守4元關口，一度大跌10%，低見3.9元，沽壓相當大，成交股數較過去100日同時段平均增9倍，暫時成交金額逾4600萬元。
IGG去年多賺7倍至5.8億元，多賺7倍，符合盈喜預告，第2次中期息6.4仙，全年合共派14.9仙，係4年以來最多，不過，盈利表現咁強勁，公司資金亦好充裕，但派息冇明顯加碼，投資者明顯唔收貨。
今日一跌，發盈喜後嘅升幅已全部化灰，股價更失守大部分主要移動平均線，只得250天線仲頂得住，即3.5元水平。
IGG出完業績大跌，股價未來可能要靠回購支撐，去年公司用咗4700萬元做回購，回購價都喺4元樓下，對上一次回購係去年12月中，回購價約3.9元，同現水平差唔多，要留意公司會唔會再出手。
