【Now財經台】洛陽鉬業(03993)擬進軍黃金產業，集團收購對象加拿大Lumina Gold公布，獲洛鉬旗下新加坡公司提出全面收購，每股作價1.27加元，溢價高達40%，總代價約5.8億加元，折合約32億港元，呢單收購規模有幾大？進軍黃金業嘅洛鉬，股價及公司狀況係咪可以參考同業紫金礦業(02899)？
信達國際研究部董事趙晞文指，可以參考紫金，但唔可以直接比較，因為紫金嘅黃金收入佔比最高，加上亦有銅業務，洛鉬核心收入來自鉬，亦係公司最核心嘅資產，今次收購嘅金礦藏量唔算多，所以，如果用紫金同洛鉬比較，只可以參考收購後嘅後續及整合，用紫金做指標。佢估計，洛鉬完成收購後，黃金相關項目資產中長期可望扭虧為盈，但短期未必會因此而受惠。
