【Now財經台】截至早上11時止，1小時內《彭博》用戶搜尋量最多港股，依次為恒基地產(00012)、中芯國際(00981)、華虹半導體(01347)、新鴻基地產(00016)及泡泡瑪特(09992)。
本港銀行同業拆息(HIBOR)跌勢未止，其中，跟樓按相關的1個月拆息跌穿2厘，加上新盤熱賣，刺激恒地及新地股價一度升7%及3%，高見24.25元及78.7元。新世界發展(00017)等今個月會有大型新盤推售，係咪會為本地地產股炒作火上加油？邊隻會跑出？
大華繼顯執行董事梁偉源指，地產商手上嘅新盤唔少，所以一旦市況好轉，地產商都唔介意用一個較保守嘅價錢去貨，不論恒地或新地，最近推出嘅新樓呎價都唔算貴，其中，SIERRA SEA折實呎價約1萬元，對買家有一定吸引力。
Steven又話，值得留意係，睇返本地地產股嘅財務狀況，新地負債比率較低及較安全，但恒地就比較高，不過，兩者都會受惠於拆息下跌，令公司利息開支減少。此外，新世界負債比率高，就算HIBOR回落，對佢嘅幫助都唔大，未來要積極減持資產，減少負債。
