【Now財經台】舜宇光學科技(02382)昨日(12日)出咗4月營運數據，手機鏡頭出貨量逾1億件，按年增長1.3%，按月增長9.2%，手機攝像模組出貨量按年跌14%，按月則增長5.2%，至於車載鏡頭按年及按月繼續錄得雙位數增長，點評估未來嘅出貨量走勢？
天風國際證券經紀業務部董事李偉傑指，舜宇喺整個手機產業中，算係比較高端嘅企業，未來要除咗要留意貿易戰變化，仲要留意手機升級潮嘅持續性，過去年半，市場一直推動手機升級潮，由摺機、人工智能(AI)功能一路推進，反映內地手機嘅成長速度正在加快，會有助提升出貨量。
Jason又指，依家內地及本港都用唔到蘋果公司(Apple Inc.)嘅AI功能，一定會影響新iPhone系列銷情，加上變化度唔高，都會減低消費者換機意欲，不過，有消息指新一代iPhone可能係摺機，雖然唔係新鮮事，但相信可帶動手機升級及換機潮。
