【Now財經台】截至早上11時止，1小時內《彭博》搜尋量最多港股，新秀麗(01910)、友邦保險(01299)、京東健康(06618)、中國石油化工股份(00386)、騰訊控股(00700)。
新秀麗出咗上季業績，純利按年倒退43%，盈利及收入都差過預期，毛利率亦收窄，大行及市場都唔收貨，新秀麗股價今早(14日)一度急瀉近10%，低見13.9元，首季未受關稅影響表現已經咁差，未來嘅情況係咪都好難樂觀？
資深證券分析師彭偉新指，新秀麗業績差同整體經濟不明朗有關，加上亞洲區換咗代言人，令銷售受短暫影響，雖然依家關稅戰有緩和跡象，信心有望回升，但唔足以提升旅遊出行需求，對新秀麗幫助亦唔大。
佢又話，現階段判斷內地未來幾季嘅經濟動力，仍然言之尚早，中美仍要繼續談判，當中仍有不少不確定因素，所以新秀麗股價短期反彈機會唔大。
