【Now財經台】中美大幅互相降低關稅措施已經喺今日(14日)中午正式生效，為期90日，關稅戰降溫帶動本港航運股連日向上，主攻中國市場嘅海豐國際(01308)及德翔海運(02510)，主攻亞洲區內及歐亞航線嘅中遠海控(01919)及東方海外(00316)，股價本周已累升9%至13%，緊貼環球同業升幅，呢個利好因素股價反映晒未？還是仲有上望空間？
元宇證券基金投資總監林嘉麒指，整體航運指數價格年初已經回落，延遲咗嘅運力需求未必喺一兩日內見到，就算用現價比較，都需要觀察1至2個月，如果運力需求出現求過於供嘅情況，而市場見到數據唔差，股價就仍有上升空間。
KK又指，運價喺疫情期間曾持續高企一段時間，相信今次都會出現呢個情況，不過，就要分地區及貨物類別，例如涉及中美航線，以及集裝箱為主嘅航運股應該仲有得升，相反，行中歐航線及乾散貨類，運價格就未必可以推得太高。
