【Now財經台】內地餐廳營運商綠茶集團(06831)昨日(8日)開始招股，今次上市集資逾12億元，首日接22億元孖展，相當於公開發售超額認購近18倍，對比啱啱上市嘅滬上阿姨(02589)首日孖展超購近80倍，點睇綠茶集團嘅招股反應及基本面？
博威環球證券金融首席分析師聶振邦指，兩者嘅差異相信係同招股規模有關，滬上阿姨僅發行約241萬股，綠茶集團就發行約1.7億股，明顯規模大好多，而茶飲股係近期熱炒概念，有利滬上阿姨表現，而歸類為餐飲股嘅綠茶集團就受惠唔到。知名度方面，相信港人對滬上阿姨較認識，綠茶集團名氣上相對差啲，都會影響招股表現。
聶Sir又認為，綠茶集團毛利率亦稍微遜色，但盈利持續有增長，其中，去年盈利按年增長逾18%至3.5億人仔，依家預測市盈率(PE)約13倍，對比百勝中國(09987)及海底撈(06862)約18倍，基本面都算唔錯。
